Unordered List

Friday, November 15, 2013

အိပ်တန်းပျောက်တဲ့ငှက်


(၁)


ဘဝရဲ့ပျော်ရွှင်စရာကောင်းတဲ့ အနှစ်သာရဆိုတာဘာလဲ။ ကျွန်မ အကြိမ်ကြိမ်အဖြေရှာမိခဲ့တယ်။ ဒါပေမဲ့
ပျော်ရွှင်မှုဆိုတာကို တစ်ခြားသူတွေဆီမှာပဲ ကျွန်မ မြင်တွေ့နေခဲ့ရတယ်။ ကျွန်မဘဝမှာတော့ နားလည်
သိတတ်စ အရွယ်ကတည်းက ဒုက္ခတွေနဲ့ရင်းနှီးခဲ့ရတာ။ ဒုက္ခဆိုတာကို ဟင်းတစ်ခွက်လိုမြည်းစမ်းခွင့်ရ
ရင်သိပ်ကောင်းမှာပဲ။  ဒါမှ ချိုရင် မြိုချပြီး ခါးရင်ထွေးထုတ်လို့ရတာပေါ့။အခုတော့ ဒုက္ခဆိုတဲ့ဝဲဂယက်က
 ကျွန်မဘဝကို အငြိုးတကြီးနဲ့ သိမ်းကြုံးစုပ်ယူနေခဲ့တယ်လေ။


ကျွန်မ အဖေက ကုန်ကားမောင်းတယ်။ ကျွန်မတို့နေတဲ့နယ်ကနေမြို့ကို ကူးချည်သန်းချည်သွားနေတာ
ပေါ့။ အလုပ်ပင်ပန်းတယ်ဆိုတဲ့အကြောင်းပြချက်နောက်မှာ ယမကာလေးကမှီဝဲလာတယ်။ တဖြည်း
ဖြည်းနဲ့အရက်နွံထဲနစ်သွားတော့ အမေနဲ့အမြဲတကျက်ကျက်ရန်ဖြစ်နေရောပေါ့။
   

အဖေနဲ့အမေ ရန်မဖြစ်တဲ့နေ့က ခပ်ရှားရှား။ အမေက အဖေ့ကိုပြောတယ်။ ရုပ်လေးတစ်ခုကလွဲပြီး ဘာမှ
သုံးမရတဲ့ ယောကျာ်းတဲ့။ အဖေကလည်း ပြန်ပြောတယ်။ တစ်နေကုန်ဖဲဝိုင်းကမထတဲ့ မိန်းမ။ ယောကျာ်း
လုပ်စာကို ဖြုန်းတီးနေတဲ့မိန်းမတဲ့။အဖေနဲ့အမေ ရန်ဖြစ်တဲ့အချိန်ဆိုရင် ကျွန်မ အိမ်ထဲကအိမ်ပြင်မထွက်
ဝံ့ဘူး။ အဖေနဲ့အမေ ရန်ဖြစ်ရင် တိုးတိုးလေး မှ မဟုတ်တာ။ ကိုးအိမ် ဆယ်အိမ်လောက်ကတော့ အသာ
လေးကြားနိုင်တယ်။ နှစ်ဆယ့်တစ်နှစ်ဆိုတဲ့ ကျွန်မအရွယ်က ရှက်တတ်တဲ့ အရွယ်လေ။ ဒါကို အဖေနဲ့
အမေ သတိပြုမိကြပုံမပေါ်ဘူး။ ကျွန်မ ရှင်သန်နေရတဲ့ဘဝကို ကျွန်မ အရမ်းမုန်းမိတယ်။


သမုဒ္ဒရာဝမ်းတစ်ထွာအတွက် အဖေနဲ့အမေ စိုးရိမ်ကြဟန်မတူဘူး။ အဖေက ကားမောင်းနေတော့  အိမ်မှာ
နေတဲ့ အချိန်က ခပ်ရှားရှားရယ်။ ပြီးတော့ ရသမျှလစာကလည်း အရက်ဖိုးနဲ့တင်ကုန်သွားရော။ အရက်
သာရရင် ထမင်းမေ့ ဟင်းမေ့။ အမေက ဖဲဝိုင်းရောက်ရင် လင်မေ့ သားမေ့။ ဒီတော့ ကျွန်မဝမ်းကို ကျွန်မ
ကျောင်းရတယ်။ ကျောင်းစာဖြစ်ဖြစ် မြောက်မြောက်မတတ်တဲ့ကျွန်မ ဆေးလိပ်တော့ ကျွမ်းကျွမ်းကျင်
ကျင်လိပ်တတ်တယ်။ အဝတ်လည်းလျှော်တယ်။ ထင်းခွဲ ရေခပ် အကုန်လာခဲ့ပဲ။ သမ္မာအာဇီဝအလုပ်မှန်
သမျှ အကုန်လုပ်တယ်။


မိဘဆိုတဲ့တံတိုင်းကြီးက ကျွန်မဘဝကို လုံခြုံအောင်မကာကွယ်ပေးနိုင်တော့ အထင်သေးချင်တဲ့သူတွေ
က ခပ်များ များ။ ရမလားလို့ အကဲစမ်းချင်ကြတဲ့သူတွေက ဒုနဲ့ဒေး။ အိုင်တွေ့တိုင်းခြေဆေးချင်တဲ့သူတွေ
ကလည်း ပေါမှပေါ။ အဲဒီအထဲ မှာမှ အဆိုးဆုံးကတော့ ဦးကျောက်ဒိုးဆိုတဲ့မုဆိုးဖိုကြီးပဲ။ ဦးကျောက်ဒိုးက
 ကျွန်မ အလုပ်လုပ်တဲ့ဆေးလိပ်ရုံပိုင်ရှင်လေ။ လူလစ်ရင်လစ်သလို ရိသဲ့သဲ့လုပ်တတ်တာ။ သမီး သမီးနဲ့
လေအေးကလေးပေးပြီး သေဆေးကျွေးမယ့် ဦးကျောက်ဒိုးကို ကျွန်မအလစ်မပေးရဲဘူး။ နွမ်းပါးတဲ့ဘဝမှာ
 အချမ်းသာ ဆုံးဖြစ်တဲ့ အပျိုစင်သိက္ခာလေးကိုပဲ လုံခြုံအောင်စောင့်ထိန်းထားရတယ်။


မပြည့်စုံမှုကိုခဝါချပြီး ထွက်ပေါက်ရှာသွားတဲ့အထဲမှာ အဖေပါသွားခဲ့တာက ကျွန်မအတွက် ကြီးမားတဲ့
ဆုံးရှုံးမှုတစ်ခု ပါပဲ။ အဖေက အမေနဲ့ကျွန်မကိုပစ်ခွာသွားခဲ့တယ်လေ။ မြို့သွားရင် အများဆုံးနှစ်ပတ်
လောက်ပဲကြာတတ်တဲ့အဖေက တစ်လကြာလည်း မလာ။ နှစ်လကြာလည်း မလာ။ စာမလာ သတင်း
မကြားနဲ့။ နောက်များကျမှ သတင်းသဲ့သဲ့ကြားမိတယ်။ မြို့မှာ နောက်မိန်းမယူလိုက်သတဲ့။ အဖေယူ
လိုက်တဲ့မိန်းမက ချမ်းသာတဲ့မုဆိုးမတဲ့လေ။ ကိုယ့်အပေါ်အစွမ်းကုန်လုံခြုံမှု မပေးနိုင်ပေမယ့် အဖေ
ဆိုတဲ့အသိနဲ့ ကျွန်မ ရင်နင့်အောင်ငိုကြွေးခဲ့ရတယ်။ အမေကတော့ ဖဲဝိုင်းသွားမပျက်။ ပြီးတော့ ပြော
သေးတယ်။


“ သွားပါစေပေါ့၊ သူထွက်သွားတော့ အိမ်တောင်မှပေါ့သွားသေးတယ်၊ လောကကြီးမှာ သူတစ်ယောက်
တည်းရှိတာ မဟုတ်ဘူး၊ သူ့ထက်သာတဲ့သူကိုရှာယူပြမယ် ကြည့်နေ ”  


အမေ့ကို ကျွန်မပါးစပ်လေးအဟောင်းသားနဲ့ကြည့်နေမိခဲ့တယ်။ ကျွန်မဝမ်းလည်းနည်းမိတယ်။ အမေ့လို
စိတ်ဓာတ် မပြတ်သားနိုင်တော့ အဖေ့အကြောင်းတွေးတိုင်း မျက်ရည်ပင်လယ်ဝေခဲ့ရတယ်။ အဖေထွက်
သွားပြီးတစ်လတောင် မကြာ လိုက်ဘူး။ အမေက နောက်ယောကျာ်းယူလိုက်တယ်။ အမေယူလိုက်တဲ့
ယောကျာ်းက ဦးကျောက်ဒိုးဖြစ်နေခဲ့တာ ကံကြမ္မာက ပေးလိုက်တဲ့လက်ဆောင်တစ်ခုလား။ ကျွန်မဘဝ
မှာတော့ ခါးသီးတဲ့ ဒဏ်ရာဒဏ်ချက်တွေက တိုးပြီးရင်းတိုးလို့နေဆဲပေါ့။


“ ဦးကျောက်ဒိုးကို ဘာလို့ယူလိုက်တာလဲ အမေရယ်၊ ဦးကျောက်ဒိုးလိုပွေရှုပ်တဲ့သူကို အမေမို့ယူရက်
တယ်၊ ရပ်ကွက်ထဲမှာ သမီးဘယ်လိုမျက်နှာပြရမှာလဲ ”  


“ ရပ်ကွက်ထဲမှာမျက်နှာမပြရဲရင် ကြိုက်တဲ့နေရာမှာသွားပြ၊ ငါအားကိုးထိုက်တယ်ထင်လို့ယူလိုက်တာကို
 ညည်းဘာမှဝေဖန်နေစရာမလိုဘူး၊ ဒီမှာ မိနှင်း..ညည်းက ငါ့ သမီး၊ ဒီတော့ ငါ့ကိုဘာမှပြန်မပြောနဲ့၊မနေ
ချင်ရင်အချိန်မရွေး ဆင်းသွား ”  


ရင်နာလွန်းလို့ပြောမိပြန်တော့လည်း အမေ့ရဲ့စိမ်းကားတဲ့စကားတွေပဲပြန်ရလိုက်တယ်။ ဒီတော့ ကျွန်မ
လည်း ဖြစ်သမျှအကြောင်း အကောင်းမှတ်ပြီး မြိုသိပ်နေလိုက်တော့တယ်။


(၂)


ကျွန်မ အရမ်းကို တုန်လှုပ်ချောက်ချားနေမိတယ်။ တစ်ကိုယ်လုံးလည်း တဆတ်ဆတ်တုန်နေတယ်။
 ကြောက်စိတ် က နေရာအနှံ့တိုးဝင်လာတယ်။ လွတ်မြောက်နိုင်မယ့်နည်းလမ်းတစ်ခုကို အသည်း
အသန်စဉ်းစားနေမိတယ်။ အရေးဟယ် အကြောင်းဟယ်ဆိုရင် နည်းလမ်းကမတွေ့တော့ဘူး။


ကျွန်မအဖြစ်က မုဆိုးလက်ထဲရောက်နေတဲ့သားကောင်လိုပဲ။ ဦးကျောက်ဒိုးရဲ့လက်ကလွတ်အောင် မနည်း
ရုန်း နေရတယ်။ ဒီနေ့မှ အမေကလည်း နောက်ကျမယ်လို့ပြောသွားသေးတယ်။ ဦးကျောက်ဒိုးကလည်း ဒီ
အကွက်ကိုပဲ ချောင်းနေတယ်ထင်ရဲ့။ ကျွန်မကလည်း ကျွန်မပဲ။ အရမ်းပင်ပန်းနေလို့ စောစောဝင်အိပ်
လိုက်မိတယ်။ ကျွန်မကို မြေခွေးချောင်းချောင်းနေ တဲ့သူရှိနေမှန်းမသိခဲ့ဘူး။ ကျောချမှ ဓားပြမှန်းသိခဲ့ရ
တယ်။ ကျွန်မ လွယ်လွယ်တော့အလျှော့မပေးပါဘူး။ ဦးကျောက်ဒိုး လက်ကလွတ်အောင် အတင်းရုန်းနေ
မိတယ်။ ယောက်ျားနဲ့မိန်းမဆိုတော့ အင်အားချင်းကမမျှ။ ရုန်းရင်းကန်ရင်းက မာကျောတဲ့အရာတစ်ခုကို
ကျွန်မ စမ်းမိလိုက်တယ်။ သံရိုက်တဲ့ တူတစ်ချောင်း။ ရလာတဲ့အခွင့်အရေးကိုလက်လွတ်မခံပဲ တူကိုဆွဲ
ယူပြီး ထိထိမိမိလှမ်းရိုက်လိုက်တယ်။


အားခနဲအော်ပြီး ဦးကျောက်ဒိုး လဲကျသွားတော့တယ်။ ဦးကျောက်ဒိုးရဲ့နဖူးကစီးကျလာတဲ့သွေးတွေ။
 အဲဒီတော့မှ ကျွန်မလည်း  တူကိုလွှတ်ချလိုက်မိတယ်။ အန္တရာယ်ကလွတ်ပြန်တော့လည်း စိတ်မအေး
ရသေးဘူး။ ဦးကျောက်ဒိုး သေပြီ လားဆိုတဲ့ အတွေးကခြောက်လှန့်လာတယ်။


“ဟဲ့ အဲဒါကဘာဖြစ်နေကြတာလဲ၊ ဘုရားရေ .. သွေးတွေ၊ မိနှင်း ညည်း တော်တော်သတ္တိကောင်းနေ
တယ်ပေါ့လေ ”  


အမေက ရင်ဘတ်ဖိပြီးပြေးဝင်လာတယ်။ လဲကျနေတဲ့ ဦးကျောက်ဒိုးကိုပြေးဖက်ပြီး ကျွန်မကိုခပ်စိမ်းစိမ်း
ကြည့်တယ်။ အမေ့ပါးစပ်ကထွက်လာတဲ့စကားက ကျွန်မရင်ကိုနာကျင်စေတယ်။ အမေက ကျွန်မဘက်
ကမဟုတ်တော့ပါလားလို့ တွေးမိ တော့ ပိုဝမ်းနည်းလာမိတယ်။


“ ညည်း တော်တော်ကိုဒုက္ခပေးတဲ့ကောင်မပဲ မိနှင်း၊ ကိုယ့်အဖေလောက်ရှိတဲ့သူကိုမရိုမသေလုပ်ရက်
တယ်၊ ညည်း ငရဲကိုမကြောက်ဘူးလား ”  


“ ဒီလူက ငရဲထက်ကြောက်စရာကောင်းတယ် အမေ၊ ဒီကိစ္စမှာ မိနှင်း မမှားဘူး ”  


“ တော်စမ်း .. ညည်းဘာမှဆင်ခြေမပေးနဲ့၊ ညည်းဒီအိမ်မှာဆက်နေချင်သေးရင် နောက်ဒီလိုမဖြစ်စေနဲ့၊
သွားတော့ ”  


အမေ့ရဲ့ဥပေက္ခာတွေကိုမခံနိုင်တော့တဲ့အဆုံး ကျွန်မပြေးထွက်လာခဲ့တယ်။ ရင်ထဲမှာလည်း နင့်နေမိတယ်။
 ကျွန်မ ဘဝက ဒီလောက်တောင်ကံဆိုးရသလား။ ကျွန်မရဲ့သူငယ်ချင်း ခက်ခက်ကိုရင်ဖွင့်တော့ ခက်ခက်
က အံကိုတင်းတင်းကြိတ် တယ်။


“ အဲဒီအိမ်ကိုပြန်သွားမနေတော့နဲ့ မိနှင်း၊ ငါ့ဆီမှာပဲပျော်သလောက်နေ ”  


“ ငါအရမ်းကြောက်နေပြီ ခက်ရယ်၊ လောကကြီးမှာ ငါတစ်ယောက်တည်းရယ်၊ အမေ့စကားတွေကိုလည်း
ကြောက်တယ်၊ ဦးကျောက်ဒိုးကိုလည်း ကြောက်တယ်၊ ငါ ဒီမှာဆက်မနေချင်တော့ဘူး၊ ဘယ်လိုလုပ်ရ
မလဲဟင် ”  


ကျွန်မ ငိုရှိုက်ရင်းပြောမိတယ်။ ခက်ခက်က စာနာနားလည်သလို ကျွန်မလက်ကိုဖွဖွလေးကိုင်လာတယ်။


“ အဲဒါဆိုရင်ငါတစ်ခုအကြံပေးမယ်၊ နင် မြို့ကိုတက်သွားပါလား ”  


 “ မြို့မှာက ငါနဲ့သိတဲ့သူမှမရှိတာ၊ သွားလို့ဖြစ်ပါ့မလားဟာ ”  


“ ဒါကတော့ နင့်သဘောပေါ့ဟာ၊ မြို့မှာအလုပ်တွေပေါတယ်ဆိုလို့ ငါ ပြောကြည့်တာပါ ”  


ကျွန်မ တွေဝေသွားမိတယ်။ ကျွန်မ မြို့တက်သွားရမလား။ ဒီမှာနေလို့တော့မဖြစ်မှန်း ကျွန်မ သိတယ်။
အမေ့ကို ရင်မဆိုင်ချင်ဘူး။ ပြီးတော့ ကျွန်မအပေါ်အကောက်ကြံခဲ့တဲ့ ဦးကျောက်ဒိုးကိုလည်း ရွံရှာမိ
တယ်။ မြို့ကိုတက်မယ်ဆိုတော့  အဖေ့မျက်နှာကိုပြေးမြင်မိတယ်။ ချမ်းသာတဲ့မုဆိုးမကိုယူပြီး ကြီးပွား
နေတဲ့ အဖေနဲ့ တွေ့ခဲ့ရင်ရော ကျွန်မ ဘာလုပ်ရမလဲ။ ဝမ်းသာအားရနှုတ်ဆက်ရမှာလား။ အဲဒီလိုမလုပ်
နိုင်မှန်းလည်း ကိုယ့်ကိုယ်ကို သိနှင့်နေတယ်။


နောက်ဆုံးတော့ မြို့တက်ဖို့ဆုံးဖြတ်လိုက်တယ်။ မြို့တက်ပြီး ပိုက်ဆံရှာမယ်။ ပိုက်ဆံက အဓိကပဲ။ အမေ
လည်း ပိုက်ဆံကြောင့် ဦးကျောက်ဒိုးကို ယူခဲ့တယ်။ အဖလည်း ပိုက်ဆံကြောင့် ကျွန်မတို့ကိုပစ်ခွာသွားခဲ့
တယ်။ ဒီတော့ ကျွန်မ ပိုက်ဆံရှာရမယ်။ မြင်းမိုရ်ရွှေတောင်ဆိုတဲ့ မိဘနှစ်ပါးကို ကျွန်မ မေ့ထားလိုက်
တယ်။ အမေက ကျွန်မ မရှိလည်း ဝမ်းနည်းမှာ မှမဟုတ်တာ။ ဒီတော့  အသိုက်ပျက်တဲ့ ငှက်တစ်ကောင်
လို လေနှင်ရာလွင့်လာခဲ့တော့တယ်။


(၃)


မြို့ကိုရောက်ရောက်ချင်း ကျွန်မယောင်ချာချာဖြစ်နေခဲ့တယ်။ ဘယ်သွားလို့ ဘယ်လာရမှန်းမသိဘူး။ အဲဒီ
အချိန်မှာ မိန်းမကြီးတစ်ယောက်နဲ့ဆုံခဲ့တယ်။ မိန်းမကြီးက အသက်သာကြီးတယ်။ ကျွန်မထက်နုပျိုတာ
တော့ အမှန်ပဲ။ ကာလာစုံတင် ထားတဲ့ မျက်နှာကလည်း နုအိနေတာပဲ။ ရွှေတွေကိုလည်းညွတ်နေအောင်
ဝတ်ထားတာ။ အဲဒီမိန်းမကြီးက ပြောတယ်။


“ မိန်းကလေးက မြို့ကိုတစ်ခါမှမရောက်ဖူးဘူးလား ”  


ကျွန်မလည်း ခေါင်းညိတ်ပြလိုက်တယ်။ ကျွန်မနဲ့ မသိပေမယ့် ဖော်ဖော်ရွေရွေမေးလာတော့ အားတက်
သွားမိတာ အမှန်ပဲ။


“ ဧကန္တအိမ်ကထွက်ပြေးလာတာထင်တယ်၊ မိန်းကလေးမှာ သွားစရာနေရာရောရှိရဲ့လား ”  


ကျွန်မ အသက်မဲ့စွာခေါင်းခါပြလိုက်မိတယ်။ နယ်မြေစိမ်းတစ်ခုမှာ ခိုကိုးရာမဲ့ဆိုတဲ့အသိနဲ့ ဝမ်းနည်းစိတ်
က ဆို့တက် လာတယ်။ မျက်ရည်တွေလည်း ရစ်ဝိုင်းလာတယ်။ မိန်းမကြီးက ကျွန်မကို ဂရုဏာသက်စွာ
နဲ့ကြည့်တယ်။


“ ကဲ .. အန်တီနဲ့တွေ့ရင် ဘာမှမပူနဲ့တော့ သိလား၊ အန်တီ့နာမည်က ဒေါ်ဒေလီစိုးတဲ့၊ အန်တီက နယ်စပ်
မြို့လေးမှာ နေတာ၊ အခုကိစ္စရှိလို့ မြို့ခဏတက်လာတာ၊ အန်တီပြန်ရင်လိုက်ခဲ့ပေါ့၊ မိန်းကလေးအတွက်
နေစရာလည်းပေးမယ်၊ အလုပ် လည်းရစေရမယ် ”  


“ ဝမ်းသာလိုက်တာ အန်တီရယ်၊ အခုလိုကူညီပေးတဲ့အတွက် ကျေးဇူးမမေ့ပါဘူးရှင် ”  


ဒေါ်ဒေလီစိုးရဲ့လက်ကိုကိုင်ပြီးဝမ်းသာအားရပြောလိုက်မိတယ်။ကျွန်မဘဝမှာ ဒီတစ်ခါလောက်ကံကောင်း
တာ မရှိခဲ့ဘူး။ ကျွန်မကို ဘုရားမတာပဲ။ မဟုတ်ရင် ကျွန်မတစ်ယောက်တည်း မသွားတတ်မလာတတ်နဲ့
ဒုက္ခရောက်ရမှာ။ ဒါကြောင့် ဒေါ်ဒေလီစိုးနဲ့အတူ နယ်စပ်မြို့လေးကို ကျွန်မ လိုက်လာခဲ့တယ်။ နေရာစိမ်း
တစ်ခုမှာ နားခိုရာရပြီဆိုတဲ့အသိနဲ့ ကျွန်မ ပျော်ရွှင်နေမိခဲ့တယ်။


ဒါပေမဲ့ ကျွန်မရဲ့အပျော်တွေက မကြာခင်မှာပဲ လွင့်ပြယ်သွားခဲ့ရတယ်။ ကျွန်မ အားကိုးတကြီး လိုက်လာ
ခဲ့တဲ့ဒေါ်ဒေလီစိုးရဲ့ဘီလူးမျက်နှာဖုံးကို မျက်မှောက်ထင်ထင်တွေ့လိုက်ရတယ်။ ဒေါ်ဒေလီစိုးက မကောင်း
တာ လုပ်စားတဲ့ မိန်းမကြီးလေ။ ကျွန်မသိရတော့ အချိန်နှောင်းခဲ့ပြီ။ ဒေါ်ဒေလီစိုးက ကျွန်မတို့လို
မယောင်မလည် မနူးမနပ်လေးတွေကို သွေးဆောင်နေတဲ့ မိန်းမကြီး။ တကယ့် မနုဿမုဆိုးကြီး။ ရွှေတွေ
ညွတ်နေအောင်ဝတ်ထားတဲ့ ဒေါ်ဒေလီစိုးကို အရမ်းရွံ သွားမိတယ်။ အဲဒီပစ္စည်းတွေက
သန့်ရှင်းတာမှမဟုတ်ခဲ့ပဲ။ ကျွန်မတို့လို ကံဆိုးမသားကောင်တွေရဲ့ဘဝနဲ့ရင်းပြီးရထားခဲ့တာ။


ကျွန်မ အကြိမ်ကြိမ်ထွက်ပြေးဖို့ကြိုးစားလည်း အချည်းအနှီးပါပဲ။ ဒေါ်ဒေလီစိုး လက်သပ်မွေးထားတဲ့ လက်
မရွံ့ တပည့်တွေက အများကြီး။ ဘယ်လိုမှ ပြေးမလွတ်ခဲ့ဘူး။ ထွက်ပြေးလို့ ပြန်မိသွားရင် တစ်နေ့လုံး
အစာငတ်ထားခံရတယ်။ ကံဆိုးမသွားရာမိုးလိုက်လို့ရွာဆိုတဲ့စကားက ကျွန်မအတွက်များ ချန်ထားခဲ့
သလားမသိဘူး။ တကယ်လည်း ကျွန်မ ဘဝက ကံဆိုးမှုအပေါင်းကို သရဖူဆောင်းခဲ့ရတာ။ ဒုက္ခဆိုတဲ့
ဝဲဂယက်ထဲကနေ ဘယ်တော့များမှရုန်းထွက်ခွင့်ရပါ့မလဲ။


သံရာရှည်ရှည်လည်ပတ်နေတဲ့ နေ့တွေညတွေဆိုတာ ကျွန်မအတွက်တော့ တစ္ဆေတစ်ကောင်လို ခြောက်
လှန့်လွန်း လှတယ်။ ဒီအမှောင်ကမ္ဘာထဲမှာငရဲကျနေတဲ့နေ့ရက်တိုင်း မျက်ရည်နဲ့ပြတ်တယ်လို့မရှိခဲ့ဘူး။
ကျွန်မလို သားကောင်ဖြစ်ခဲ့ရတဲ့ ဘဝတူမိန်းကလေးတွေလည်း အများကြီးပဲ။ ကျွန်မတို့ဆီရောက်လာတဲ့
သူတွေထဲမှာ အဘိုးကြီးတွေကအများဆုံးပဲ။ တရား ထိုင် ပုတီးကိုင်ရမယ့်အရွယ်မှာ တဏှာနွံထဲခုန်ဆင်း
နေကြတဲ့သူတွေကိုကြည့်ပြီး ကမ္ဘာကြီးအတွက်ရင်နာမိတယ်။ အဲဒီလို လူလို့မခေါ်ထိုက်တဲ့သူတွေကို
တင်ထားရတာ ကမ္ဘာကြီးဘယ်လောက်များပင်ပန်းရှာလိမ့်မလဲ။


“ ငါတော့ အသက်တောင်မရှင်ချင်တော့ဘူး မိနှင်းရယ်၊ ငါတို့ဘဝက အရှင်လတ်လတ်ငရဲကျနေသလိုပဲ
ဟာ ”  


“ ငါလည်းဒီလိုပါပဲဟယ်၊ အမေတို့တားနေတဲ့အကြားက မြို့တက်လာမိတာ နောင်တရမိတယ်၊ ဖြစ်နိုင်ရင်
အမေတို့ ဆီ ပြန်ပြေးသွားချင်လိုက်တာ ”  


နွယ်နွယ်နဲ့ ကေသီက မျက်ရည်ကျပြီးပြောတယ်။ ကာလာစုံတင်ထားတဲ့မျက်နှာပေါ်မှာ နောင်တမျက်ရည်
စီး ကြောင်းတွေကအထင်းသား။ သူတို့ကိုကြည့်ပြီး ကျွန်မ ရင်ထဲဆို့နင့်လာမိတယ်။


“ ဟဲ့ ကောင်မလေးတွေ .. ထွက်လာခဲ့စမ်း ”  


နားယဉ်နေပြီဖြစ်တဲ့ ဒေါ်ဒေလီစိုးရဲ့အသံကိုကြားလိုက်ရတယ်။ ကျွန်မတို့ အရွံရှာစက်ဆုပ်ရတဲ့ အသံ။
ကျွန်မတို့ ကြောက်ရွံ့ထိတ်လန့်ရတဲ့ အသံ။ ဒီအသံကိုကြားတိုင်း ကျွန်မတို့တစ်တွေ တစ်ယောက်လက်
ကိုတစ်ယောက် ဆုပ်ကိုင်ထား ကြစမြဲ။ သွေးပျက်ချောက်ချားမိကြစမြဲ။


“ ဟဲ့ ကောင်မလေးတွေ .. ထွက်လာခဲ့လို့ပြောနေတယ်နော် ”  


ဒုတိယအကြိမ်အသံထွက်လာပြီဆိုရင် ကျွန်မတို့မထွက်လို့မရတော့ဘူး။ တစ်နေ့လုံး ထမင်းအငတ်ခံထား
တာတွေ။ မထင်ရင် မထင်သလို ဆံပင်ဆောင့်ဆွဲတာတွေ။ ကျွဲရိုက် နွားရိုက်သလို အရိုက်ခံရတာတွေက
 များလွန်းလှပြီလေ။ ဒီတော့ကျွန်မတို့မျက်ရည်အဝိုင်းသားနဲ့ထွက်လာခဲ့ရတော့တယ်။ အခန်းပြင်ရောက်
တော့ ရေချိန်ကိုက်နေတဲ့အဘိုးကြီးတစ်ယောက် ရဲ့ အကြည့်ရိုင်းရိုင်းတွေကိုရင်ဆိုင်လိုက်ရတယ်။ အဲဒီ
လိုအကြည့်မျိုးတွေကိုမြင်ရလွန်းလို့ရိုးအိနေပြီဆိုပေမယ့်ရင်မဆိုင်ရဲ စွာနဲ့မျက်နှာလွှဲမိခဲ့တာလည်းအကြိမ်
ကြိမ်ပဲ။


“ အနီရောင်လေး ”  


ဆိုတဲ့စကားသံက ကျွန်မနားထဲမှာ ဗုံးဆယ်လုံးတစ်ပြိုင်တည်းပေါက်ကွဲသွားသလို မြည်ဟည်းသွားတယ်။
ရင်ထဲမှာလည်း ဆို့နင့်လာတယ်။ ကျွန်မ ဘဝကို ကျွန်မရင်နာလို့မဆုံးဘူး။ ကျွန်မ ဝတ်ထားတာ အနီ
ရောင်ဂါဝန်လေးလေ။ ဒေါ်ဒေလီစိုးရဲ့လက်ထဲကို ပိုက်ဆံတွေရောက်သွားချိန်မှာတော့ ကျွန်မပါးပြင်ပေါ်
ကို မျက်ရည်ကြောင်းလေးတွေ ဖြတ်စီးသွားတော့တယ်။


(၄)


“ မိနှင်းရယ် ”  


အခန်းထဲကိုပြန်ရောက်လာတော့ နွယ်နွယ်တို့နဲ့ တစ်ယောက်ကိုတစ်ယောက်ပွေ့ဖက်ရင်း ငိုကြွေးမိကြ
တယ်။ ကျွန်မတို့ ဒီလိုငိုကြွေးရင်း ညပေါင်းများစွာကိုဖြတ်သန်းလာခဲ့ရတာ နည်းသလား။ အချိန်တိုင်းလို
လို ဒီဘဝငရဲထဲကနေ လွတ်မြောက်နိုင်ဖို့ဆုတောင်းမိကြတယ်။


“ အခုတစ်လော ရဲတွေလည်း ပိတ်စိတိုက်ရှာနေကြပြီတဲ့၊ ဒီအလုပ်လုပ်တဲ့သူတွေကို အရေးယူနေတာ
လည်း မနည်းတော့ဘူးတဲ့ ”  


“ ဒေါ်ဒေလီစိုးလည်း အပြင်ထွက်ရင် သိုသိုသိပ်သိပ်နဲ့ ရုပ်ဖျက်သွားနေတာတွေ့တယ်၊ ရဲတွေမြန်မြန်ဖမ်း
မိပါစေလို့ ဆုတောင်းမိတယ် မိနှင်းရယ် ”  


နွယ်နွယ်က အားတက်သရောဆိုရှာတယ်။ ဒီသတင်းကို ကျွန်မလည်းကြားမိသား။ ဒီလိုဥပဒေမဲ့လုပ်ရပ်
တွေကို သက်ဆိုင်ရာက တင်းတင်းကြပ်ကြပ်အရေးယူနေတယ်ဆိုတာလေ။


“ ဖမ်းမိရင် ငါတို့လည်းထောင်ကျမှာပေါ့နော် ”  


ကေသီရဲ့ငိုမဲ့မဲ့အသံလေးထွက်လာတယ်။


“ ဒီမှာငရဲကျခံနေရတာထက်စာရင် ထောင်ကျတာကပိုကောင်းပါတယ် ကေသီရယ်၊ ငါတို့လည်း ဒီအလုပ်
ကို လုပ်ချင်လို့ လုပ်တာမှမဟုတ်တာ၊ အပြစ်ခံရလည်း ဘယ်လောက်အထိခံရမလဲ၊ ငါတို့ဘဝတွေကို
ဒီလိုရှင်သန်နေရမယ့်အစား ထောင်ထဲမှာပဲ ငါတို့ဘဝကိုသန့်စင်ချင်တယ်ဟာ ”  


ကျွန်မ ပြောလိုက်တော့ နွယ်နွယ်တို့ ခေါင်းညိတ်ပြီး ငြိမ်သက်သွားကြတယ်။ ပြီးတော့ ကိုယ်စီကိုယ်ငှ
 သက်ပြင်းချသံ သဲ့သဲ့ကလည်း တစ်ပြိုင်နက်တည်းထွက်ပေါ်လာတယ်။


“ ကဲပါဟယ် .. စိတ်မကောင်းစရာတွေ တွေးမနေပါနဲ့တော့၊ အိပ်ပျော်အောင်သာ အိပ်လိုက်ကြရအောင် ”  


ခင်းထားတဲ့ဖျာပေါ်မှာ အားလုံးဝင်အိပ်လိုက်ကြတယ်။ ဒါပေမဲ့ အိပ်လို့တော့မပျော်ဘူး။ တိတ်ဆိတ်နေတဲ့
ညမှာ အေးအေးချမ်းချမ်းအိပ်စက်နိုင်ဖို့အခွင့်အရေးက ကျွန်မတို့မှာရှားပါးလွန်းလှတယ်။ မနက်ဖြန်ဆိုတာ
ကိုတွေးမိတိုင်း ကျွန်မတို့ အားလုံး အသက်ရှူကြပ်ရစမြဲပဲလေ။


ဒီလိုပဲ ငိုရင်း ရှိုက်ရင်း မိုးလင်းခဲ့ရတဲ့နေ့ပေါင်းလည်း များလွန်းလှပြီ။ ကိုယ့်ဘဝကို စဉ်းစားမိတိုင်း ရင်နင့်
ခဲ့ရတဲ့ အကြိမ်ပေါင်းလည်း များလွန်းခဲ့ပြီ။ ဒါကြောင့် ကျွန်မ မျက်လုံးကိုပိတ်ပြီးနေလိုက်တယ်။ ဒီလိုနဲ့ပဲ
အိပ်ပျော်သွားမှာပါ။ အိပ်ပျော်သွားတဲ့အခိုက်အတန့်လေးလောက်သာ ကျွန်မဘဝ လွတ်လပ်ခွင့်ရမှာ။
မနက်ရောက်လာရင် လောကငရဲကို ကျခံရဦးမှာ။ ဒီတော့ အိပ်ပျော်သွားအောင်ပဲ ကြိုးစားနေမိတယ်။


ဒီလိုနဲ့ အမှောင်ခွင်းလို့ အလင်းဆောင်လာပြီး မနက်ဆိုတာကို တစ်ကျော့ပြန်ရောက်လာတယ်။ နေ့ဆို
ပေမဲ့ ကျွန်မတို့ အတွက်ကတော့ ညနဲ့မခြားတဲ့ အကျည်းတန်နေ့တွေပါပဲ။


မနက်တိုင်း ထမင်းတစ်ပန်းကန်နဲ့ ကော်ဖီတစ်ခွက်တော့ ပုံမှန်သောက်ရတယ်။ ပြီးရင် မှန်တင်ခုံရှေ့ဝင်
ထိုင်။ ပုရိသ တွေ သွားရည်ကျအောင် အလှပြင်။ မျက်နှာကို ကာလာစုံတင်။ ပြီးရင် ဒေါ်ဒေလီစိုးရဲ့
ခေါ်သံမကြားမချင်း အခန်းထဲမှာနေ။ ဒါတွေက ကျွန်မတို့ကျင်လည်နေရတဲ့ ဘဝတွေပေါ့လေ။
ကျွန်မတို့အခန်းထဲမှာအလှပြင်နေတုန်းအပြင်က ဆူညံသံတွေကို ကြားလိုက်ရတယ်။ ကျွန်မတို့
အားလုံး နားစွင့်မိလျက်သား ဖြစ်သွားတယ်။


“ ဘာသံတွေလဲ မိနှင်း၊ ဆူညံလိုက်တာဟယ် ”  


“ ဟိုမိစ္ဆာမကြီး ဘာတွေကြံနေသလဲမှမသိတာ၊ အသာလေးနေလိုက် ”  


အပြင်က ဆူညံနေပေမယ့် ကျွန်မတို့ ဘာသိဘာသာပဲနေလိုက်တယ်။ ထွက်ကြည့်လည်း ထူးမှမထူးတာ။
ကျွန်မတို့ ဘဝကိုဖျက်ဆီးခဲ့တဲ့ ဒေါ်ဒေလီစိုးရဲ့မျက်နှာကို မမြင်ရလေ ကောင်းလေပဲ။


“ ဟေ့ တံခါးဖွင့်စမ်း ”  


တစ်ခါမှမကြားဖူးတဲ့ လူစိမ်းတစ်ယောက်ရဲ့အသံကိုကြားလိုက်ရတယ်။ အသံကတော့ မာထန်ထန်ပဲ။
 နွယ်နွယ်က  ဖွင့်ပေးလိုက်ရမလားလို့ အသံတိတ်မေးတယ်။ ကျွန်မလည်း ခေါင်းညိတ်ပြလိုက်တယ်။
ဒေါ်ဒေလီစိုး လွှတ်လိုက်တဲ့ သူတွေပဲ ဖြစ်မှာပေါ့။ ဒါပေမဲ့ ကျွန်မ အထင်နဲ့အမြင်တက်တက်စင်အောင်
လွဲသွားတယ်။ အခန်းတံခါးကိုဖွင့်ပေးလိုက်တာနဲ့ ရဲတွေ ဝင်လာပြီး ကျွန်မတို့ကို လက်ထိတ်ခတ်လိုက်
ကြတယ်။ တဒင်္ဂတော့ ကျွန်မတို့အားလုံး ကြောက်စိတ်နဲ့ တုန်လှုပ်သွားကြ တယ်။ နောက်တော့မှ
လက်ထိတ်တွေကြားကနေ ကျွန်မတို့ ပြုံးမိသွားကြတယ်။


အမှောင်ကျခဲ့တဲ့နေ့ရက်တွေကနေ ကျွန်မတို့ လွတ်မြောက်ခွင့်ရပြီ။ ဒီဘဝဆိုးကို ကျောခိုင်းခွင့်ရခဲ့ပြီ။
ဒေါ်ဒေလီစိုး တို့လူတစ်စု အသည်းသန်တုန်လှုပ်ချောက်ချားနေသလောက် ကျွန်မတို့အားလုံး ကြည်နူး
နေခဲ့ကြတယ်။ အချုပ်ကားပေါ် ရောက်တော့ နွယ်နွယ်ကလှမ်းပြောတယ်။


“ ဒီဘဝဆိုးကလွတ်မြောက်ခွင့်ရတာကိုပဲ အရမ်းဝမ်းသာလှပြီဟာ၊ ငါ အပြစ်ကလွတ်ရင် အမေတို့ဆီပြန်
ပြီး ကောင်းကောင်းနေတော့မယ် ”  


“ ဟုတ်တယ် .. ထောင်ကလွတ်ရင် ငါ ရွာပြန်တော့မယ်၊ ငါ့မိဘတွေနဲ့ပဲနေတော့မယ်၊ နင်ကရော မိနှင်း ”  


ကေသီရဲ့ စကားကို ကျွန်မ မကြားသလိုလုပ်ပြီးနေလိုက်တယ်။ ကျွန်မ မျက်ဝန်းမှာတော့ မျက်ရည်တွေက
 အရှိန် ပြင်းပြင်းနဲ့စီးကျလာတယ်။ သူတို့တစ်တွေမှာ ခိုဝင်စရာမိဘရင်ခွင်ဆိုတာရှိသေးတယ်။ ကျွန်မဘဝ
ကတော့ အိပ်တန်းပျောက် နေတဲ့ ငှက်တစ်ကောင်လိုပါပဲလား။ ကျွန်မမှာ ခိုလှုံစရာနေရာဆိုလို့ ဗလာ
နတ္ထိပါပဲ။ သူစိမ်းဆန်လွန်းတဲ့ အမေ့ရဲ့အကြည့်တွေ။ ရမ္မက်မီးတောက်နေတဲ့ ဦးကျောက်ဒိုးရဲ့အကြည့်တွေ။
 အဲဒီလို အကြည့် မျိုးတွေနဲ့ ကျွန်မ ရင်မဆိုင်ချင်တော့ဘူး။ ထောင်ကလွတ်ရင် ကျွန်မဘဝ ရိုးသားသန့်စင်
စွာနဲ့နေထိုင်သွားနိုင်မယ့် အိပ်တန်း တစ်ခုတော့ ကျွန်မ ရှာဖွေရဦးမှာပါ။



                                                                         အပျိုစင်မဂ္ဂဇင်း
                                                                     နိုဝင်ဘာလ ၊ ၂၀၁၃။



0 comments:

Post a Comment

Twitter Delicious Facebook Digg Stumbleupon Favorites More